Luk 12 | ASO | STEP | Ne'mine navo evene' vai' goloso tauseni ne'mine igi di nubo igi giki' igi oko'nido' oko'nido' igi nizavo Izesu' aza izipahala zuho nene do gomu' molo-ngedo api' ogo ti' lo lo-ngimine': Halisaio' mono' laa' avetidati' zisiti bekini paula gele vine' nene dikelizaze. Lingine ningisa minilo. Zisitimu' noluvoni' nene ingine lu'ningu' monovo goloso di haleki mini go'ine izi evene' lisihe' gili monaa' nani' monovo'inemu' nene zisitilo' lo molo noluve.

Luke 12

Lu'ningu' Monovo Goloso Di Haleki Mini Go'ine Izi Evene' Lisihe' Gili Monaa' Monovomu' Nene Ehe' Igi Minilizangumu' Izesu' Lo-ngimine' Gamazi

(Mataio' 10:26-27)

1 Ne'mine navo evene' vai' goloso tauseni ne'mine igi di nubo igi giki' igi oko'nido' oko'nido' igi nizavo Izesu' aza izipahala zuho nene do gomu' molo-ngedo api' ogo ti' lo lo-ngimine': Halisaio' mono' laa' avetidati' zisiti bekini paula gele vine' nene dikelizaze. Lingine ningisa minilo. Zisitimu' noluvoni' nene ingine lu'ningu' monovo goloso di haleki mini go'ine izi evene' lisihe' gili monaa' nani' monovo'inemu' nene zisitilo' lo molo noluve. 2 Idise mene hito neine' inite' muki' nene soto' ogavo ningi gililisave. 3 Nemu' nene lingine suno' haleki liti'musou' ne'mine lengikovo' laa' nani' gamazi nene evene' mukilite soto' gililisave. Ido' lengi' numudingu' lengikovo' mini nununga li lilizani' gamazitine nene numuno o'mota mini asi naba li li soto' i-lingidilisave.

Evene' Laza Golise've Gelelonive Nene O'moso Ei' Hamo' Ne Neive Line' Gamazi

(Mataio' 10:28-31)

4 Ido' zogo zuhokizo, naza ti' lo nolo-lingimuve: Evene' ingine lingibili hilisa a'midoti' nene gohi gohi ma di goloso i-lingidilizani' nomize. Nemu' nene engikumu' golise gilamilo. 5 Gilamilizani'za golise've gili-dilizave nene lo-lengemelove. nGebele helosa vo'ine haza nesi mudise ngebelo hulo oloku' oga' amuzo'vesi minive ei' nemukovo' nene golise've gililo. Ee, mo lamineto' nolo-lingimuze. Golise've gililo. 6 Gilahe. Nama ngomo ngomo oso'moho' ne'mine nene haza inite' ve li gili gulehe' moni ngomo sita' nene huli nama faef (5) meni hizaa' nave. Ne'mine iga' nani'za O'moso'mo gizebo o-ngedo minidoti' nene hamokisi ma gala molosa'mive. 7 Ne neiha lengita inite' ngomo lasolosi goloso ogalive lo godotine zopovo muki' nene gate osu' lo nelokisi gizebo oga' neive. Ido' nama ngomo ngomo muki' nesi nene ngivile' igi lingine inite' naba nizanaze. Nemu' lingine nene golise gilamilo.

Izesu' Gulive Lo Soto' O-ngemeloningumu' Line' Gamazi

(Mataio' 10:32-33; 12:32; 10:19-20)

8 Ido' naza ti' lo nolo-lingimuve: Ve ma ingine eveneliti ve'nido' neni' evenele none li li soto' ilizani' nene O'mosolati' ve gihile naza a'mine'mine ogo O'moso'mi angeloliti ve'nido' engikumu' nene neni' evene'ne nizave lo lo soto' o-ngedelesuve. 9 Ido' ve ma eveneliti ve'nido' neni' evenele nomune li lilizani' nene naza a'mine'mine ogo O'moso'mi angeloliti ve'nido' ingine neni' evene'ne nizamave lo lolosuve. 10 Ido' ve ma ingine O'mosolati' ve gihile nenikumu' gamazi goloso li-nidi divi ledivi' i-nidilizani' nene O'moso'mo a'mine lihime nene ha apase-ngedeleseine'za O'moso'mi Sikalahu' nemu' gamazi goloso li-di divi ledivi' i-dilizani' nene O'moso'mo a'mine lihime nene apase-ngedelido' nomive.

11 Ido' mono' numungu' nehe ngamani nabala nehe ido' guve'inesi ve nabala nehe lengele'mizi di vi neni' ne'metaa' nangumu' goni' nii-lingidavo ma nene engi' liliza gamazilo' nadive lolobe ido' nani gamazi lolobe li gopo gatine nene gilamilo. 12 Lingine liliza gamazi nene a'mine gonito' lengele'mize milaliza gamenelo' gehepeve nene O'moso'mi Sikalahuli'mo lo-lengeme' lengeme' ivo lilisave. Nemu' nene lingine gopo gatine gilamilo.

Heneni Ve Heneni'inemu' Gilikevo Dizaa' Neine' Nene Mo Negi Ga'ine Gilaa' Nave Lo Nemu' Aneza Gamazi Line' Gamazi

13 Ne'mine lavo di gese' igi minani' aleveuti' ve mali'mo Izesu'ni ti' lo lo-imine': Tisazo, gaza uvo'nehine lo-danivo me'nehi inite' mata' nene ize' molo lingela nemelive. 14 Ne'mine lo line'za Izesu' ti' lo lo-imine': Nadi' ive. Lengi' goni' gele-lengedaa' ido' inite' mata' ize' molo-lengedaa' olongumu' nene zaho nele'mize molo neine' neve. 15 Ne'mine lo ti' lo lo-ngimine': Minevo' alevo' gihile laminekisi minaa' nene inite' ato ato' vai' minadoti' nene ma soto' osa'mine' nenako nemu' nene inite' gohi gohi daliza gatine nene mo keke' gilami ehe' igi ningisa minilo. 16 Ne'mine lo lo-ngemo gepe' gamazi ma ti' lo lo-ngimine': Moni heneni ve mali'mi mi'veu' nene noso' nite' vai' goloso o molani'. 17 Ne'mine ogavo aza lulou' ti' lo gala giline': Naza noso' nite' dolizo do molaloni' numuno nene naba nominako nadolove lo gala giline'. 18 Ne'mine ogo ti' lo giline': Naza noso' nite' molaa' numuno nene kuso do naba ogo gizelove. Ne'mine ogosa a'mingu' nene inite' mata'ne lamine' nesi noso' nite'ne nesi nene molalove. 19 Do molosa naza ti' lo gelelove: Inite' mata'ne nene muki' goloso neinako a'mine nene osu' lo-nidamivo kilisimasi vai' goloso ogo voloseive. Nemu' nene naza mine gelo nolize izo noso avoso no noso' nite' no minelove. 20 Ne'mine lo gelo line'za O'moso'mo ti' lo lo-imine': Gaza negi hize vane' mene naza geitati' vongahaza nene idise holuka' dokuvo helelesainako gaza inite' mataka do salani molaine' ma nene zaho dalive. Gasika ha do minelibe. 21 Ido' evene' ma angise'inemukovo' ve li heneni vai' di milisa O'moso'mi velelo' heneni ne'mine monovo lamine' engita vai' lo minamivo minavela nene a'mine heneni vela soto' ine' suno nene soto' o-ngedeleseive.

Okode Losuvo'mi Initekumu' Nene Gopo Gate Gelamo O'mosola Gele Mu'musi' Ogo Minaakumu' Izesu' Lo-ngimine' Gamazi

(Mataio' 6:25-34)

22 Ne'mine lo Izesu' aza izipahala zuho ti' lo lo-ngimine': Evene' oko'ine losuvo'mi initekumukovo' gili minaa' avela nene luvoni' ne'mine inite' nene soto' o-ngedaa' neine' nenako nemu' nene naza ma ti' lo nolo-lingimuve. Ga'nali'mo helamo vetesi ha mineloningumu' noso' nite' nene nani nalonivo lii gopo gatine gilaa' nani' nene alamilo. Ido' okodidokumu' nene nanite' ngolalonivo lii gopo gatine gilaa' nani' nesi nene mo alamilo. 23 Vetesi minevo' alevo' ogo minaa' ne'mo noso' nite' nene ivile' ogosa inite' naba neivo ido' okode ne'mosi nene okodelo' inite' nene ivile' ogo inite' naba neine' nenaze. Nemu' nene gopo gatine gilamilo. 24 Ido' lingine namaliti monovo nemu' nene gatine ma gili'nalo. Ingine naliza noso' nite'ine nene ma zuho' igi dolizi di milaliza numu'ine nesi nene ma nomivo ma dolizi milisa'mavo O'moso ne'mo nene noso' nite' ngemaa' neive. Ne'mine o-ngedaa' neine'za lengi' nete nama nene ngivile' igi inite' naba nizani' nenako O'moso'mo lengikumu' nene ha gele minaa' neive. 25 Lengikuti' ve zaholi'mo inite' matakumu' gopo gala ma gele do vo minelidi'mo eze mino molo iline've nene do ha'na ilive. Mo ngelo ngomosi ma do ha'na amoloseize. Nemu' nene gopo gatine gilamilo. 26 Ido' lingine inite' ngomo a'ne'minesi nene ma amilizado' o neine' nenako lingine inite' linge ma nemu' nene gopo gatine nanimu' gilaa' nave. 27 Guviseu' guvovo inite' nene dizi guvovo iga' nani' nemu' nene ningi gililo. Ingine gono di oko'nido' inite' nene ma ongoti ngilisa'mani'za O'moso'mo do lamine' o-ngedaa' neive. Gozopo' guvelesi ve Solomoni' nene oko'nolo' inite' lamine' goloso ngolaa' ine'za naza ma lo-lengemelove. Aza ngolaa' ine' inite' nene lamine' minani'za guvovo iga' naani' inite' nene mo ngivile' isa'mani' ve. 28 Ido' a'mine guvovo inite' nene inite' lamine' ne'mine minamo gamene ha'na minesa'mive. Idise ha mineline'za aize' nene goko' lavo evenelite oloku' di gizilisave. Ne'mino neine'za O'moso ne'mo a'mine guvovo inite' nene do lamine' goloso oga' neive. O'moso ne'mo haza inite' a'ne'mine nene ha do lamine' o-ngedaa' neine' nenako lengi' nene guvovo inite' ngivile' igi inite' naba nizani' nenako okodido' inite' nene ma lengemamilido' o neihe. Ha lengemelido' o neive. Nemu' nene lingine amuzo mili O'mosomu' gili ele'vole' ilizanako gili ele'vole' amave. 29 Ido' lingine nani nalonivo li naliza initekumu' vise' igi gopo gatine gili minamilo. 30 Misubo mukiku' aleve muki' nete nene nevo'mine mana'mine ga'ine nene gilii a'mine inite' nene viseto' minaa' nave. Ne'mine igi minaa' nani'za Okulumoku' metibo ne'mo nene a'mine a'mine inite' nene dami haza ma minamilisave lo gele neive. 31 Okodine losuvo'mi initekumu' nene gopo gatine gilami asi O'moso'mo gizebo o-lengedelingumu' ve li ei' gele neidokovo' di mili a'mine gizebo o-lengedelingumu' nene vise' igi minilo. Ne'mine ilizani' nene a'mine inite' nesi lehize-lengedo ido' okodine losuvo'mi inite' nesi nene ha lehize-lengedeleseive.

Okulumokuko Heneni nGaneni Molaloningumu' Line' Gamazi

(Mataio' 6:19-21)

32 Lingine O'moso'mi zuho sipisipi ize mulise ngomo ne'mine gili minave, lingine nene lengehelele izamivoo. Metibo ne'mo ei' gizebo o-lengedeli monovo lehize-lengedelesa gala gelaa' neine' nene lanite' gele minosa gelaa' neive. 33 Lingine inite' matatine nene evene' ma meni hizilisa ilizave nene ma ngimii a'midoti' moni dalizani' nene goho' aleve hize ele' i-ngidi ngimilo. Ne'mine ilizadi'mo henenitine nene Okulumokuko salani milalisave. Moni nehe inite' ma nehe hanipausiu' salani molalone' nene a'mine hanipausi nene hulupo elo hukavo do'mozeleseize. Okulumo' nene hulupo elamiline' hanipausitine ne'mine minavosa henenitine a'mingu' salani milalizani' nene osu' lamivo ido' guminelo' ve netesi a'mida vamavo ido' naba' naba kolokolosi netesi nene di goloso amilisaze. Nemu' henenitine nene Okulumokuko milalo. 34 Ido' henenitine Okulumokuko milalo noluvoni' nene eveneliti lutine nene henenitine minida vo minaa' neine' nenako nemu' ne noluve.

Guvelesi Ve Alingumu' Do Nene Ogo Minaa' Gamazi Lo-ngimine' Gamazi

35 Lingine nene oti lavolavotine di liki letitine nene gopodido' di izi gili' li lamutine nene lo minivosa di nene igi minilo. 36 Ido' gizebo ve'ine vene' huki mili-di noso' nite' gize vata' ado' monosa ogo akahelo' izeline' lite' lo si'ze-deloningumu' ve li ve ma ingine gizebo igi minaa' nani' ne'mine igisa minilo. 37 Ido' gizebo ve'ine ne'mo ogo ningivo okise ingami nizavo ningelive ingine nene ngolize iziliza akalo' mini mili minilisave. Naza lamineto' ma lo-lengemelove. Gizebo ve'ine ne'mo ogo gonou' lavolavo nene do liko lingine igi noso' nite' nalo lo-ngedo asi've nene noso' nite' ize' molo ngemeleseive. 38 Gizebo ve'ine holuka' ongo velepeto' nehe go' lalosa neivo nehe ogo ningivo gelekele' izipahala ingine ha gizebo igi nizavo ningeline' nene ingine mo ngolize iziliza akalo' nene mini mili minilisave. 39 Ido' lingine mene gili'nalo. Guminelo' ve'mo bedine' numuno ne'mi meleho aza guminelo' ve olihe amivosa aline' gamenemu' nene ma gele minidiniko numu'velo' nene gizebo ogavo guminelo' ve ne'mo nene ma bedamidine. 40 O'mosolati' ve gihile naza nene aloseive li gilamiliza gamenelo' alosuze. Nemu' lingine nene a'mine'mine igi di nene igi minilo.

Gelekele' Izipe Laminekumukisi Ido' Gelekele' Izipe Golosomukisi Aneza Gamazi Lo-ngimine' Gamazi

(Mataio' 24:45-51)

41 Ne'mine lo lavo Petolo' aza ti' lo lo-imine': Guvekasi ve, gaza gepe' gamazi nolo-lemane' mene lelikumukovo' nolo-lemabe ido' evene' mukikumu' nene nolane. 42 Ne'mine lavo Guvelesi ve'mo ti' lo lo-imine': Gelekele' izipe peleseve' izamaa' ave otohato i minave mukikumu' noluve. Ido' Guvelesi ve'mo gelekele' izipe ma do kegeso ele'mize molo neni' gelekele' izipe'ne mukito' nene gizebo o-ngedo ingine noso' nite' naliza gamenelo' gamenelo' nene noso' nite' ngemeka' ngemeka' ogo minelive lo ele'mize molavo gelekele' izipe aza peleseve' izamaa' ive otohato o minive noline' nene aza nadi' o'mo vo minelido' o neive. 43 A'mine do kegeso ele'mize molani' gelekele' izipe ne'mo a'mine meleho imine' gono nene dovo dovo' ogo neivo Guvelesi ve ogo hetelo ningeline' ne'mo gelekele' izipe eze nene lamine' iline' akalo' mine molo mineleseive. 44 Nemu' nene naza lamineto' ma lo-lengemeloze. Guvelesi ve aza ogo a'mine gelekele' izipe nene monovolo ningo inite'ne mukito' nene gizebo o-nedelive lo lo-emavo gizebo o-deleseive. 45 Ne'mine iline'za a'mine gono imive gelekele' izipe ne'mo nene neni' gizebo ve'ne ma nene mo lite' lo amiko nomino gamene alingeta alihe lo gala gelo eze gizebo o-ngedo minine' vene' vemoho' nene ngebeledo' ngebeledo' ogo mino noso' nite' haza gidini no mino ido' noso no sipaki ogo minaa' noilingu' nene 46 a'mine gelekele' izipe aza gizebo ve'ne nene ne gamenelo' aloseive lo gelamo ngelo amoloseive lo gelo mineline' gameneu' nene gizebo ve've ogo hetelo ezemu' gili ele'vole' isa'mave o-ngedaa' idi'mine ogo belo do goloso gehepeve o-deleseive.

47 Ido' gelekele' izipe mali'mo ei' iline' initekumu' guvelesi ve'mo lulou' gele minine' nene ningo gele mino do va'va' ogo a'mine lulolo' e'metamiline' nene guvelesi ve'mo do goloso ogosa beleleseive. 48 Ne'mine oloseine'za gelekele' izipe gohi mali'mo ei' iline' initekumu' guvelesi ve'mo lulou' gele neine' nemu' ningo gelamo gavoso beleline' votigilelo' ogo monovo goloso daline' nene guvelesi ve'mo mo beleline'za nabosa belamoloseive. O'moso'mo vauve elo hize ele' o-ngedaa' neive muki' nene ingine o-ngiduvoni' votigilelo' di mili vauve ili neni' gono nene hize ele' ilizave lo gelo mineleseive. Ee, O'moso'mo gizebo i-nidilizave lo inite' vai' ngemaa' neivemu' nene a'mine ngimine' initeto' golo hizi inite' vai' goloso di-nidilizave lo amuzo molo gele minosa a'minemu' gizebo ogo minaa' neive.

Izesu' Monokumu' Evene' Hizi Ho'lilizani' Gamazi Lo-ngimine'

(Mataio' 10:34-36)

49 Naza me misubouko lemo uvoni' nene evene' engiku' olo' enge vite' olosa uvoni' ve. Agae, a'mine olo' nene idisesi mene lo miniliko lo amuzo molo nogiluve. 50 Naza mulumo alumo nite' gihi-nidikevo a'mine'mi lulou' ma mineloni' o neive. Nemu' nene lu'neu' geni naba nonibilive. A'mine lu'neu' geni nonibiline' osu' lo-nedeline' nene a'mine mulumo alumo inite' gihi-nidilizani' nene gehe pelekuvosa nene osu' loloseive. 51 Lingine naza lemo uvoni' nemu' nene misubo mukiku' lovo muki' nene osu' lavo evene' muki' nene honguvo' li minilisave li gili nizahe. O'ove. Naza lemo uvoni' ne'mo nene evene' hizi ho'li minilisave losa nolo-lingimuve. 52 Ne'mine noluvoni' nene ado' idise meloti' nene evene' numuno hamoku' ingaa' ani' aleve faef ne'mine minilizanguti' linge ma nenita gi'mizikevo ma nene gi'mizamavo ho'li mini seta' netise setohamo nene biluva' i-ngidasivo setohamo nete seta' nene biluva' i-ngidavo minilisave. 53 Hizi ho'li minilizani' nene meleholi'mo gipele biluva' o-divo gipele'mo melehine biluva' o-divo ido' izeleho'mo aluvo biluva' o-divo aluvo'mo izelehine biluva' o-divo ido' avoloholi'mo onohulo biluva' o-divo onohulo'mo avolohine biluva' o-divo minilisave.

A'mine Gamenelo' Engi' Vovo'ningu' Soto' Ine' Initeliti Monovomu' Nene Gililizanako Gili Vevesamavo Nemu' Izesu' nGelemo Line' Gamazi

(Mataio' 16:2-3)

54 Ne'mine lo lo-ngemo di gese' ani' aleve nene gohi ti' lo lo-ngimine': Lingine Isilaele' misubou' mene ho' lemaa' idati' limuso nene ma navo ningi ti' li laa' nave: Goline mo izeleseive li laa' nave. Ne'mine likevo goline nene lingine lado' lamineto' mo izaa' neive. 55 Ido' hepe' emalati' naba elo oduvo ani' nene lingine ti' li laa' nave: Ho' naba goloso loloseive laa' nave. Ne'mine likevosa lingine mo lado' ho' naba goloso laa' neive. 56 Soza sunolavo' monave lingine mene Okulumotasi misubolasi ningisa ne'mine inite' soto' oloseive li ize' mili ningi gilaa' nani'za lingine idise mene ogo molo nouvoni' nemu' nene nanimu' ize' mili gilisa'mave.

Goni' I-lidilizave Mulu'ningu' Do Hongu Lo-ngedaa' Monovomu' Izesu' Line' Gamazi

(Mataio' 5:25-26)

57 Ido' lengi' igi mili ilizado' lisihe' o mineline' monovo nene langisetine di kegesi ningaa' ilizanako nanimu' ningisa'mave. 58 Ve mali'mo goni' o-gedelesa gele'mize do zasila novivo ma nene mo zasila gele'mizo vavo zasi ne'mo pilisi veti a'ningu' molavo huli galapusolo' i-gidikelizaze. Akalo' olihe nivi ma nene a'mine goni' o-gedelesa ive nene amuzo molo mulunou' do hongu lo-dezo. 59 Naza lamineto' ma lo-gemeloze. Gaza zogo emo mulunou' do hongu lo-damanivo galapusolo' huli-gidilizani' nene gaza a'mingu' mino lihimeka apaseka' apaseka' ogo mino meni hize osu' gehepeve losavo' nene osu' losa volosange. Zogo emezo.